紅軍碎“斯”萬段
利物浦在歐冠盃已經穩奪十六強一個席位，現階段可以專攻聯賽，繼續與車仔爭分奪位，今晚主場迎戰中游分子韋斯咸，實行上演一幕“晏菲路大屠殺”。
上周歐冠盃做低馬賽又係謝拉特建功，所以話紅軍“有神奇隊長，賓帥唔使荒張”，當然仲有沙比艾朗素、古爾特、加歷查及馬斯卓蘭奴等幾位球員出色表現，至於王子托里斯發揮雖然一般，但佢牽引作用絕對係球隊另一殺着。由於利物浦目前正與車仔鬥到頭崩額裂，甚至有可能最終要以得失球定名次，所以利物浦唔單止要贏波攞三分咁簡單，盡量爭取入球亦係主要任務之一，整定韋斯咸今晚唔好彩。
韋斯咸班波又係一支欺善怕惡球隊，十四場贏五場，除富咸之外，其餘所贏四場對手都係排在榜尾掙扎球隊，而對住強隊可以話“鵪鶉咁個樣”，而且班波最大弊病就係輸開就輸，“畏強症”相當嚴重。上季作客晏菲路球場輸到毫無反擊之力，今季人腳又變動不大，想復仇？諗都唔使諗，初盤開出利物浦硬讓球半，一於去片，捧利物浦。
推介：利物浦 4：0
