墨甲：瓜達拉哈拉大學殺迪響頭炮_東方日報
2024-07-26
瓜達拉哈拉大學殺迪響頭炮
積極招兵為冠軍而來
今季墨甲足智彩都有得玩，聽朝首輪焦點賽事，冠軍熱門之一嘅瓜達拉哈拉大學，主場鬥塔巴迪奧。瓜達拉哈拉大學上季兩階段聯賽常規賽都排第2位，今季季前積極招兵，希望可以進一步挑戰冠軍，第一擊主場出戰可謂志在必得，主勝值得信賴。
（周六早上11時開賽）
瓜達拉哈拉大學上季係墨甲表現最穩定球隊，兩階段聯賽（常規賽）總成績係墨甲之冠，並且喺次階段季後賽殺入決賽，實力足以問鼎冠軍。佢哋除保留舊班底外，季前更招攬唔少猛將，包括從今仗對手塔巴迪奧手上，撬走進攻核心奧根尼斯達以同後防主力阿古約，一前一後實力升呢，令今仗形勢此消彼長。
塔巴迪奧失主力難捱
反觀塔巴迪奧有主力被挖角，但未有引入具質素球員代替，令本來已經唔強嘅陣容更見薄弱。翻查兩隊對上4次交手，瓜達拉哈拉大學贏咗當中3次，甚有格食格味道，今仗一於追主隊可旗開得勝。文:工廠仔