英超：英超煞科鬥到最後_東方日報

今晚英超煞科有3大戰場！焦點當然係冠軍之爭，阿仙奴能否奇迹後上捧盃，除咗睇自己造化，仲要睇住韋斯咸面口做人；歐霸席位之爭，車路士有可能超越熱刺上到第5，而紐卡素同曼聯同樣有機會可以趕過車仔上第6。護級方面只剩數字上嘅可能，尾三嘅盧頓要追12個得失球，先可以超越諾定咸森林留級，10場英超今晚11點同時開波，球迷豈能錯過？
贏波封王！曼城強攻大晒冷
英超冠軍近在眼前，曼城喺主場撲擊韋斯咸。「藍月亮」擁有絕佳火力，艾寧夏蘭特有力喺韋斯咸身上取得入球，助球隊大勝贏得英超，韋斯咸入得又失得，無欲無求下，亦唔介意同曼城鬥攻，曼城近3場聯賽主場全開5球或以上，中位數調至4.5球照捧入球大。（Now聽621周日晚11時直播）
曼城失落歐聯，球隊固然希望奪取英超錦標嚟填補，收咧戰喺主場出擊，最好以大勝嚟迎接英超冠軍。曼城現時領先阿仙奴2分，今場贏波就肯定史無前例取得英超4連冠，為免夜長夢多，預料「藍月亮」必藉主場之利，一開波就喪攻韋斯咸。
「藍月亮」擁有英超最強火力，37戰入93球，除咗夏蘭特上場梅開二度，喺英超射手榜領先之外，啱啱當選英超最佳球員嘅菲爾科頓，都隨時可以為曼城取得入球。
韋斯咸入得又失得
韋斯咸喺歐霸出局後，聯賽只得1和2負，幸好上場喺聯賽主場謝幕戰，以3比1擊敗盧頓及時反彈。「錘仔幫」不乏射得之人，查洛保雲今季射入16球，湯馬士蘇錫克亦可為球隊帶來進帳。但可惜球隊防守不濟，37場失71球，只比榜尾3隊少，所以今季經常出現大手交易，今場喺無任何壓力下，可以同曼城合演入球騷，4.5球大盤玩得過。

速炒拖肥！阿仙奴望有奇迹
英超煞科日焦點戰，阿仙奴主場硬撼「拖肥糖」愛華頓。阿仙奴仍有一絲奪標希望必定搏盡，近期連場報捷弗到震，「拖肥糖」已經上岸，鬥心成疑，遇上搶韁嘅阿仙奴，隨時半場畀人數幾粒，半場主勝冇肉食，轉捧1.5球半場大。（Now聽622周日晚11時直播）

阿仙奴踏入下半季氣勢如虹，近17場聯賽豪取15勝1和僅1敗，包括上場赴「凶地」奧脫福球場，頂住沉重壓力以1比0險勝曼聯，近17次造訪奧脫福球場第2度獲勝，今季聯賽已累積27場勝仗，打破咗2004年「不敗奪冠球季」26勝嘅隊史紀錄。雖然爭標形勢仍處於被動，但只要曼城對韋斯咸失分，自己做好本分贏波，就會後上封王，戰意唔使懷疑，翼鋒李安度杜沙特近5場聯賽入4粒，腳風奇順，配合夏維斯、馬田奧迪加特及布卡約沙卡，火力全開。

愛華頓客場表現曳
另邊廂，愛華頓喺被扣8分嘅困境下，仍然成功護級，單計近5場聯賽獲4勝1和，睇落狀態不俗，但要留意4場勝仗均來自主場，近5次作客僅得2和3負，包括造訪車路士慘吞6蛋，客場演出打折扣，況且最重要嘅護級任務已完成，難免欠缺爭勝動力。
阿仙奴擅於先發制人，近5場聯賽全勝之餘，全部於上半場已取得領先優勢，加上近4次主場對愛華頓，亦有3次半場開2球或以上，為免夜長夢多，一定趁早入多幾粒速戰速決，再等待曼城嗰邊賽果博奇迹出現，半場大有計。