韓聯：FC光州表現走樣 浦項制鐵客W有分頭_東方日報

韓職周中賽事，研究一場FC光州對浦項制鐵。FC光州上季甫升班就攞到聯賽季軍，表現予人驚喜，但估唔到咁快就打回原形，成績急跌，至於浦項制鐵仍然係爭標分子，現時高踞聯賽次席，佢哋近5場聯賽作客贏4場，表現對辦，建議直取更好分嘅客勝。（無綫myTV聽SUPER周二下午6時30分直播）

FC光州上季係升班球隊，全季表現穩定，最後獲得聯賽第3名，成績僅次於冠軍蔚山HD同次席嘅浦項制鐵，但踏入今季成績大跌，3至4月期間經歷6連敗劣績；雖然近期回穩，但表現仍然波動，上場作客仁川聯賽和1比1，現時喺聯賽榜排第8位。佢哋主場成績亦大起大跌，錄得4勝4負，包括上次主場淨吞下游球隊全北汽車3蛋，輸得咁肉酸難免影響士氣，今場迎戰前列勁旅浦項制鐵，再輸亦屬正常。

鄭在熙有力再數胡
浦項制鐵歷來在韓職獲得5冠5亞，近季仍然係爭標分子，今季目標直指冠軍，但上場主場迎戰FC首爾，被對方逼和2比2痛失兩分之後，由原本榜首跌落次席，現落後宿敵蔚山HD聽1分，相信呢兩隊今季有排鬥，浦項制鐵今場贏波將可重返「1哥」位，肯定全力搏殺，早前對FC光州亦贏1比0，當時由前鋒鄭在熙補時一箭定江山奠勝，呢位30歲鋒將近3戰攻入兩球，今季已累積7球並列射手榜第3位，今場再鬥FC光州隨時再數胡，客勝可取。