英超：施洛「考牌戰」防線要頂住_東方日報
2024-10-24
今輪英超重頭大戰，由利物浦主場迎戰車路士，榜首嘅紅軍季初走勢凌厲，碰上近况回勇嘅車路士，估計戰情非常緊湊。
各項賽事取得6連勝嘅紅軍，相信主帥施洛相當滿意球隊發揮，包括上場小勝水晶宮1比0，聯賽至今只失兩球，不過今場面對車仔，先係施洛真正考驗。事關紅軍將陷入魔鬼賽期，而且正選門將艾利臣比加仍需養傷，大有機會用副選基利靴擔正，這門將早前國際賽更加出現失誤，今場紅軍能否保持銅牆鐵壁也成疑問。
馬利斯卡或以攻代守
車仔上場1比1打和森林，但係早前比賽取得5連勝，可見狀態已經逐漸回升，重拾勁旅本色。隊長列斯占士已經復操，今場有望披甲上陣，相信主帥馬利斯卡再添一名大將，信心十足，特別係大紅人高爾彭馬今季大爆發，上月尾對白禮頓用了約20分鐘，已經取得4個入球，今場必定成為紅軍重點防守對象。車仔仍有箭頭尼高拉斯積遜、快翼馬度基及查頓辛祖，相信馬利斯卡會以攻代守，加上雙方交手經常平分秋色，估計今場大有機會握手言和。文:謝德謙