亞冠：決賽首回合有地利 水手勇銳夠贏艾阿恩_東方日報
2024-05-12
亞冠盃決賽爆發激戰！首回合由日職勁旅橫濱水手，主場迎戰阿聯酋球隊艾阿恩；兩隊喺4強都被一致睇淡下晉級，實力不相伯仲，不過水手主場威力十足，今仗有望藉地利先拔頭籌，捧主勝。
（HOY聽TV聽76台周六晚6時直播）
兩隊都係亞冠盃決賽稀客，水手喺準決賽憑互射12碼淘汰蔚山HD，相隔24年再入決賽，力爭首度稱霸亞洲，戰意高昂。無可否認水手喺今季日職表現唔好，但去到亞冠盃就非常醒神，近5場亞冠盃主場法定時間錄得4勝1和，氣勢強勁。
艾阿恩客戰靠唔住
水手前鋒安達臣盧比斯狀態大勇，近4場主場有3場拎到入波，近5場亞冠盃亦有4球進帳，係水手闖入決賽嘅關鍵人物，今仗對住近2場亞冠盃失6球嘅艾阿恩防線，有力繼續數胡。
21年前曾奪亞冠盃冠軍嘅艾阿恩，喺4強爆冷淘汰希拉爾，令普羅球迷大跌眼鏡。不過呢支阿聯酋勁旅近況令人擔心，近4場作客1勝3負，而且今屆亞冠盃由16強到4強，3輪淘汰賽作客只得1和2負，每圈都係靠主場晉級，今次作客不宜高估。