英超：曼聯防線不整捱唔得耐 喜鵲先發制人_東方日報

今日「拆禮物日」英超安排一場大戰送畀球迷，「紅魔鬼」曼聯喺主場奧脫福硬撼紐卡素。曼聯陣容不整之餘，後防又連番甩轆堅唔穩陣；「喜鵲」踢法慣性先發制人，今仗隨時又先開紀錄，一於捧佢哋「第一隊入球」，實行佳節收大禮。（Now 621及611周六凌晨4時直播）文:法達斯維

曼聯依家問題多多，除咗麥比奧莫、馬沙拉奧及阿密特迪亞路要出戰非國盃而缺陣外，後防兩位大將馬菲斯迪歷特及哈利馬古尼亦養傷當中，連隊長般奴費南迪斯上仗都勇戰傷出，實力進一步受削，搞到主帥魯賓艾摩廉頭都痕埋。尤其係馬菲斯迪歷特倦勤後，「紅魔鬼」後防失去一位領袖，惟有焗起用小將約羅及艾登希雲，可惜兩人明顯經驗不足，場上經常有怯場感覺，就算身邊嘅勞基梳爾都幫唔到幾多，令隊球失波頻頻，睇番佢哋近10仗贏得4場，而且場場有失波，後防不穩信唔過，主場被紐卡素先攻陷絕不為奇。

禾達美迪腳風順
另邊廂，紐卡素雖然作客成績麻麻，單計聯賽8場作客只得1勝3和4負，但佢哋有樣嘢叻，就係今季英超暫時唯一頭30分鐘冇失波嘅球隊。建基喺呢個基礎之下，令「喜鵲」可以經常先入波，翻查紀錄，佢哋各項賽事近15場，有13次先開紀錄，單計聯賽近9場有8次打破僵局，儘管上仗被車路士逼和2比2有啲唔抵，不過射手禾達美迪延續近期上佳腳風，個人梅開二度，聯賽已經有7球進帳，唔好忘記另一前鋒尤尼韋沙好番可以候命，令調動更添靈活性，加上近6次交手贏5次，擺明食住曼聯，難得遇上主隊防線欠完整，大把機會搵到着數，不妨博佢哋再次先入波。