歐國盃：冠軍熱捧法國冷敲奧地利_東方日報
2024-06-27
今屆歐國盃已經完成分組賽，爭標熱門當中，以法國、德國及西班牙表現最對辦，其中上屆世盃亞軍法國仍然保持水準，即使射手基利安麥巴比首戰撞爆鼻受傷，幸好已經無大礙，加上奧士文尼迪比利、馬古斯杜林及基沙文等中前場球員極具級數，攻力相當可靠。
決賽組合揀「法奧」
事實上，迪甘斯領軍法國12年，建立咗一套有效戰術，過去8年先後獲世盃1冠1亞，2016年歐國盃亦殺入決賽，球員大賽經驗極之豐富，雖然佢哋跌落上線賽區強手林立，但仍然係第3熱門，屬今屆冠軍首選。
至於另一邊賽區，英格蘭睇落高一班，但修夫基嘅保守戰術屬最大隱憂，去到淘汰賽要撳掣轉「Plan聽B」甚至「Plan聽C」唔夠決斷，不如博吓冷門奧地利。「逼搶之父」蘭歷克成功改造球隊，而且條線非常靚，入到4強先有機會對英格蘭或意大利，唔係冇機會殺入決賽創造奇迹，18倍屬半冷之選。
決賽組合方面，法國、德國、西班牙同葡萄牙4強處於同一區，呢3隊一於揀法國入決賽，至於另一邊，足智彩已經幫大家揀咗，因為有關奧地利嘅決賽組合，只係開咗鬥法國，否則就係「其他」，一於揀25倍嘅「法國-奧地利」啦！