日職：紅鑽搶分上岸捧首入_東方日報
2024-10-30
星期三日職上演獨腳戲，橫濱水手主場迎戰浦和紅鑽，兩隊今季聯賽成績低迷，依家只係排中下游位置，只要唔降班都冇乜好爭。水手已將注意力放喺盃賽上，因此今場對紅鑽唔見得有甜頭，考慮到紅鑽踢法較為搶韁，博客隊第一隊入球更加划算。（無綫myTV SUPER周三晚6時直播）
水手下半季主攻盃賽，啱啱先喺日皇盃4強激戰，踢足120分鐘輸畀大阪飛腳，月中喺日聯盃又係4強出局，依家佢哋會集中火力踢好亞冠盃，佢哋下星期又要迎戰武里南聯，肯定會全力搶分。喺咁頻密嘅賽程之下，聯賽反而成為水手最唔重視嘅比賽，就算最近5場聯賽只得1和4負劣績，但仍然排喺第13位，明顯欠缺搶分動力之下，今仗主場出擊都難以睇好。
夠主動作客照攻水手
紅鑽上仗主場贏柏雷素爾後，終止聯賽4連敗困局，目前同水手同分，位列中游，護級壓力大大減少。不過紅鑽冇任何盃賽要兼顧，當然成副心機擺喺聯賽繼續搶分，希望提早「上岸」，今仗對住頹勢嘅水手，絕對係打落水狗嘅好機會，踢法多數會先下手為強；睇番紅鑽近4場作客，有3場係率先入波，貫徹佢哋主動出擊嘅風格，客隊紅鑽第一隊入球值得捧場。文:工廠仔